الزوجة الصالحة ، أسماء شميس حكاوي بالعامية

 حكاوي بالعامية 

أسماء شميس

-مالك؟

-- مصدع ومخنوق وقرفان، سيبيني في حالي عايز اقعد لوحدي!

- طب وحد اللّٰه بس

-- لا إله إلا اللّٰه

- استغفر ربنا بقى..

-- استغفر اللّٰه العظيم

- صلِ على حبيبك النبي

-- عليه الصلاة والسلام

- مالك بقى؟

-- بقولك إيه! دماغي مش ناقصة

- إنتَ هتزعق لي ولا إيه لا بقولك إيه!

-- هتعملي إيه يعني؟

- هقوم اعملك جاتوه بالشوكولاته حالًا أومال إنتَ مفكر إيه؟ هتزعق لي واسكت لك كده لأ طبعًا، أي نعم إنتَ طلع لك كرش صغنن كده بس عسل وربنا مش مشكلة، الاكتئاب بيحب الالوظة أصلًا

-- لأ ألوظة إيه؟ هيبقى أنا وإنتِ مألوظين كفاية إنتِ!

- إيه قصف الجبهة ده، احممم لأ مسمحلكش على فكرة بقى، على فكرة أنا بقالي ٤ ساعات عاملة دايت مسمحلكش تنكر جهودي ومشروعاتي هو أنا بلحة ولا إيه؟

-- لا فشر مكنتش اتجوزتك

- بحسب، المهم متخرجنيش برا الموضوع، إنتَ مصدع وزهقان وقرفان وعايز تقعد لوحدك صح؟

-- المفروض، دا بعد اذنك يعني من فضلك أرجوكِ!

- حبيبي تسلم، من غير ما تستأذن ده زي بيتك واللّٰه، طيب اسيبك أنا بقى تستمتع بإكتئابك الجميل، أنا في الاوضة اللي جنبك تاني شمال على اليمين لو احتاجت أي حاجة إيَّاك تنادي عليَّ عشان مش هرد عليك، يلا باي..

-- احمممم عبد الموجود موجود؟

- جاي ورايَّ ليه دلوقت؟ بالسهولة دي تجرح مشاعري وجاي عايز تصالحني؟ هي أوض الناس لعبة ولا إيه؟

-- أصالح مين يا ماما أنا جاي بدور على فردة شرابي الكحلي هي فين؟

- أيوة أيوة شوفتها كانت ماشية من هنا ألحقها قبل ما تروح بعيد بقى طلعت يمين من هنا

-- هنستظرف ولا إيه؟

- لا معاذ اللّٰه

-- احمممم طيب أنا آسف عشان اتعصبت عليكِ إنتِ ملكيش ذنب ♡

- تقبلته، كفاية إنك جيت لي من أخر الصالة لحد الأوضة هنا مشوار بصراحة، دا تقدير ليَّ كبير جدًا ♡♡

-- ربنا ما يحرمني منك طيب ♡

- تخيل كده لو ربنا يحرمك مني! حياتك هتبقى عاملة... ألا صحيح هتتجوز بعد ما أموت بكم شهر؟

-- هو الأربعين وخلاص!

- كنت متأكدة! مفيش انتماء خالص؟ طب قول الستين مثلًا!

-- جديدة الستين دي أنا أعرف إن الميت له أربعين وسنوية بس!

- يالهوي إنتَ تقصد اربعيني كمتوفية وكده؟ مش اربعينك إنتَ لما تكبر وتعدي الاربعين سنة؟

-- إلبس، احممم فكك من السيرة الغم دي بقى يا حبيبتي، وحشتيني..♡

- هفكني حاضر، ماشي ربنا يسهل

-- بقول لك وحشتيني!

- ماشي وأنا بقول لك ربنا يسهل

-- هو أنا بقول لك تعالي نتفسح؟

- سيبك بقى قول لي مالك؟ مبحبش أشوفك زعلان بجد، شكلك مؤثر جدًا وببقى عايزة أعيط بس بعدين برجع أقول تماسكِ نفسك يا بت مش كده مينفعش تكوني هشة، ده أنا حتى جيشك الوحيد، ولا إيه؟

-- يا ربي مش مصدق ازاي بتخليني أضحك من قلبي كده وأنسى كل همومي معاكِ ربنا ما يحرمني منك، دا إنتِ جيشي الوحيد وإنتِ بابا وإنتِ ماما، أنا جعان أوي مأكلتش من الصبح..

-- روح قلب ماما يا ناس خمسة والأكل يكون جاهر اغسل إيدك وحصلني♡♡

 

--يا ما شاء اللّٰه الأكل ريحته جميلة جدًا وشكله حلو تسلم إيدك♡

- يسلم لي اللي بيديني الفلوس اشتري بيها الأكل ومستتني ومهنيني واللّٰه إنتِ عسول وقمر هموت وأعرف حماتي متوحمة عليك في إيه؟

-- كفاية ضحك بطني وجعتني عايز اكل بقى♡

- طيب طيب، كُل يا حبيبي صحة وهنا، صحيح عملت إيه في الشغل النهاردة؟

-- كان يوم عادي جدًا وكله ضغط وارهاق وصوت عالي وزعيق وقلة ذوق من الناس زي كل يوم وازعاج وقرف الحمد للّٰه، وناس داخلة وناس خارجة، متتخيليش كمية الراحة والهدوء اللي بحس بيها أول ما أدخل البيت، وألاقيكِ واقفة بتبتسمي لي كده، بقشعر واللّٰه ببقى عايز أعيط من الفرحة ♡

- ربنا يقويك ويعينك يا حبيبي أنا عارفة إنك بتتعب وبيطلع عينك برا، بس إنتَ قوي وراجل عظيم وتقدر على كل ده وأكتر بإذن اللّٰه.

-- أنا قوي عشان إنتِ شيفاني كده واللّٰه♡

- إنتَ مش قوي وبس إنتَ حمايتي وسندي وأماني.

-- إنتِ اللي خرجتي كل الحاجات الحلوة دي من جوايا، هدوئك وعقلانيتك ونضجك وخفة دمك وذكائك وجنونك وطفولتك، كل ده خلاني احس إني بتربى على إيدك من أول وجديد كأني لأول مرة بتعلم الصح والغلط، علمتيني الرحمة وخلتيني اهجر الغلظة، خرجتي من جوايا أحسن ما فيَّ، عارفة وأنا في الكلية كنت ببات في بيت خالي، عشان مكنتش لاقي سكن، زوجة خالي كانت لسانها طويل وكانت غلاطة ومش بتحترمه، وخالي كان عصبي بدل ما كانت تحتويه لحد ما يهدأ كانت تعمل العكس وتفضل تزعق فيه وتعلي صوتها وتقف له الند بالند وتطول لسانها وتعايره بعيوبه قدام أطفالهم وأنا كمان الغريب كنت موجود عندهم، أومال لما بتبقى معاه لوحدها بتقول له إيه! كنت بحس إن خالي مكسور مش قادر يرفع عينه في حد ولا يبص لي ولا يبص لأولاده.

 خوفت، خوفت لما اتجوز ربنا يبتليني بزوجة زي دي وكنت بدعِ ربنا في كل صلاة ربنا يرزقني بإنسانة صالحة تحتويني وتشوف الحلو اللي فيَّ وتحاول تساعدني أصلح الوحش، أنا عارف إني مش كامل وفيَّ عيوب كتير، واحنا الرجالة لما بنتعصب مش بنشوف قدامنا ولا بنحس باللي بنعمله ولا باللي بنقوله، والزوجة العاقلة هي اللي تعرف تكسب زوجها في اللحظات اللي زي دي، مش تكرهه فيها وتنفره منها، الحمدللّٰه إنك كنتِ من نصيبي، مش عايزك تزعلي مني لو في يوم اتعصبت عليكِ أو زعقت، أنا من جوايا مش ببقى عايز اعمل كده وببقى عايز افكر بهدوء لوحدي، بس إنتِ الوحيدة اللي بحس إنك ملجأي وإنك إنتِ الوحيدة اللي ينفع تشوفيني بالحالة دي وبيبقى عندي عشم إنك هتتقبليني بوجعي زي ما بتتقبليني في هدوئي وسعادتي والحمدللّٰه عشمي بيكون في محله دائمًا، احنا كلنا الرجالة بنفكر كده عايزين نقعد في كهف لوحدنا، بس أنا قدرت أتكلم و أعبر عن اللي جوايا غيري مش بيحب، غيري بيشوف ان اعترافه ده ضعف، بس وإيه يعني لما إنتِ تشوفيني في لحظة ضعف ما أنا برضو إنسان؟ ومن حقي اتعب واتعصب وأعيط؟ إنتِ بتعيطي ليه؟

- بحبك يا أقوى وأجدع راجل في الدنيا، أنا عمري ما شوفتك ضعيف، أنا دائمًا بشوفك ابني اللي محتاج لحضني عمري ما شوفتك ضعيف ولا ناقص فيك أي حاجة، إنتَ بالنسبة ليَّ في منتهى الكمال اللي ممكن ربنا يجمعه في زوج واحد، ومتخفش أنا مبزعلش، ومعدنيش نية ازعل طالما بتقدرني وبتحترمني كده ♡

-- واللّٰه تقديري واحترامي ليكِ دا كله إنتِ السبب فيه، إنتِ اللي بتجبريني احترمك واقدّرك، ربنا يخليكِ ليَّ ومحرمنيش منك♡♡

- الكلام ده عايز حضن بس مش مشكلة، مش مشكلة خلص أكل يلا بس الاول عشان نحلي وكده

-- امممم هنحلي بمين؟

- جاتوه بالشوكولاته.

-- اممممم طيب

- اسكت مش هتصدق مين جات لنا النهاردة؟

-- مين؟

- بوسي

-- بوسي مين؟

- بوسي يا حبيبي! القطة بتاعة جارتنا اللي في التالت، زي العسل، جات يا حبيبتي تعبانة وواقفة عمالة تبص لي ببراءة صعبت عليَّ وحامل بقى وبطنها لحد هنا، شكلها مقربة تولد

-- دي القطة؟

- ايوة، دخلتها بقى ترتاح وحطيت لها لبن شربته كله يا روحي شكلها كانت عطشانة الحر مبهدلها

-- دي القطة؟

- ايوة، كنت نفسي تأكل جاتوه بالشوكولاته بس شكل اللبن كبس على نفسها

-- دي القطة؟

- ايوة، واتكلمت معاها شوية، وبعدها قامت مشيت، ايوة القطة

-- لا دا أنا كنت هسأل سؤال تاني خالص، هي مشتكتلكيش في جوزها بالمرة؟

- أنهي واحد؟ دي تقريبًا متجوزة حوالي ١١ واحد ومش بتشوف حد منهم خالص

-- واضح إنها اتكلمت في حاجات تانية أهم.

- إنتَ بتألس عليَّ هي القطط بتتكلم؟ إنتَ رايح فين؟ مش هتحلي طيب؟

-- لا بقى تحلية ايه؟ ابقي شليها لـ بوسي تيجي تحلي بكرة، أنا رايح أنام كفاية عليَّ كده !

- هو مشي ليه ده؟ دا أنا كنت لسه عايزة احكي له عن الفار اللي لاقيته في المنور، حبيبي اعمل لك شاي ؟

-- .......
.
.
.
أسماء شميس

حكاوي بالعامية