الخرطوم،- عاصمة السودان. متين تضحك سماء الخرطوم حبيبتنا.

 الخرطوم العاصمة المثلثة للسودان

 يا الخرطوم يا العندي جمالك جنة رضوان 

طول عمري ماشفت مثالك في آي مكان، 

انا هنا شبيت يا وطني وزيك ما لقيت يا وطني،

يا وطني يا بلد أحبابي في وجودي أريدك وفي غيابي،

بتزكر فيك عهد صبايا علي شاطئ النيل،

وحبيبي جالس معاي اسمر وجميل،

كانت أيام يا وطني زي الأحلام يا وطني.

 السودان بلد النور، أرض الحب و الخير . يقع في قارة إفريقيا و عاصمته الخرطوم.

الخرطوم المدينه العذراء الجميلة المكسوه بالمباني الإنجليزيه القديمه.

فيها تلاته مدن كبيره :

- مدينة بحري سر الهوى

 -مدينة امدرمان الحلوه بي ناساها.

- مدينة الخرطوم حبيبتنا السماها بتضحك كل يوم.

‏محطة محطة بتذكر..

عيونك و نحن في المنفى

وبتذكر مناديلك

خيوطها الحمراء ما صدفة

وبتذكر سؤالك لي..

متين جرح البلد يشفى؟

متين تضحك سما الخرطوم

حبيبتنا و متين تصفى.

الخرطوم بالرغم من إنه هي العاصمة إلا إنه اغلب شوراعها متغطية بالرمال البرتقاليه المميزه البتتحول للون الاخضر في موسم الخريف.

سماها عباره عن لوحة فنية بخلفية زرقاء.

المدينه الحبيبه البتخلي الزول يحس بحنين و شوق ليها كل ماطالت فترة غيابو عنها.

مبانيها عتيقة و جميلة و ألوانها شوارعها برغم الجوطه الفيها بس رتيبه.

كيف هي شوارع الخرطوم؟

شوراعها بسيطه شديد شبه سكانها، جميلة و هادية و مهما لفيت فيها ما بتشبع منها.

ارضها طين عشان خصبة و في الخريف ساعة الامطار و السيول ببقى لونها اخضر، صح بكون في خيران كتيرة خور باليمين و خور بالشمال و تجازف عشان تطلع من الحِلة و تصل الشارع بدون ما تتوسخ.

لكن جمال الجو و ريحة الطين المبلول بي موية المطر بطغي على كل ده و بكون الجو جميل شديد.

فصل الخريف من أجمل الفصول في السودان صباح الخريف بكون صباح مختلف بريحة طينة مبلوله بمطره و صوت عصافير و جو ملان غيم.

اما في فصل الصيف،درجة الحرارة بتنافس درجة حرارة الغليان، الشمس بتكون أسخن مايكون و اشعتها عموديه.

 لكن ليمون مركز بي ١٠٠ جنيه بخفف من الوضع شويه.

ده ليمون بارا و خضارها و جايبنو بالطيارة.

و كمان شارع النيل و هواء شارع النيل.

من أهم الشوارع في الخرطوم شارع النيل،

جمال نيل السودان جمال مافي زيو.

الجَبنة مع الفشار و القعدة جنب ست الشاي و لمة الصحاب جنب النيل

و جزيرة توتي و الونسة في توتي و سيد الايسكريم البكون لافي بعربيتو 

شارع النيل عالم تاني في الخرطوم 

كيف شكل الخرطوم بليل ؟

ياجمال سماء الخرطوم بليل و هي مزينه بالنجوم ، شوارعها الرئيسيه بتكون مزينه باللمبات الفي الشارع العامله زي حبات اللؤلؤ.

و شوارعها الداخليه بتكون مزينه بلمبات ناس الحي.

من عاداتنا كسودانين انه كل بيت لازم ينور لمبه قدام باب بيته عشان الطريق ينور لأي زول ماري بالشارع.

ليل الخرطوم هادىء و رتيب.

الحياة في السودان برغم الظروف الاقتصاديه الصعبه بس حياة مرتبه و بتمشي بسلاسله و بساطه بدون تعقيد.

متين تضحك سماء الخرطوم حبيبتنا...

 بُكره يا الخرطوم تعودي 

وترجع الذكريات جميله

وفيك بُكره الورد يزهر

وتلاطف الزهرات خميله

وبكره ترجعي زي زمانك

وتطلع الأيدي العميله

وفيك شرق النيل تغني

وفيها حنلاقي الزميله 

وفيها صالحه نلاقي خوه

ونفتح السيره الجميله

بُكره ياخرطوم تعودي

فيكِ بحري الناس تهلل

وفرحتهم مافيش شبيها

عقول صغارا لسه بحبو 

وجاها يوم وأمست نبيها 

وفيها تلقى الأم تزغرت

وفيها ساكه الصيد ظبيها 

وفيها كوبر ياحلاتها 

وزكريات معدوم شبيها

وبُكره يا خرطوم تعودي

فيك بُكره الناس تكبر

وترجع ام در لي أمانها

وارجعو أطفالنا البراعم

وإمشو المدارس في زمانها

واي زول قد خان ضواحيكِ 

وخش مداينك برضو خانها

ومد سلاحو علي نساءك

وما إحترم عزه وأهانها 

حنقطع الإيد البمدها 

ونكتل الناس الأعانها 

وبكره ترجعي زي زمانك

وترجع الخرطوم وأمانها

وبكره يا خرطوم تعودي